index introductio imagines || partitura exemplar translatio

bibliographia e-mail

CTH 406

Exemplar --

Citatio: A. Mouton (ed.), hethiter.net/: CTH 406 (Expl. --, 07.05.2012)

§ 1

1 -- UMMA fPaškuwatti MUNUS URUArzawa

2 -- ēšzi=[ma=(š)š]an INA URUParašša

3 -- mān LÚ-ni kuedani ḫaš[š]atar NU.GÁL

4 -- našma=aš MUNUS-ni menaḫḫanda U[L L]Ú-aš

§ 2

5 -- nu=(š)ši DUliliyaššin šippanta[ḫ]ḫi

6 -- n=an INA U4.3.KAM mūgāmi

7 -- ḫantizzi U4-ti kiššan iyami

8 -- 1 NINDA.ERÍN.MEŠ ḫarpanza

9 -- nu=(š)šan katta kī ḫāndan 3 NINDA.GUR4.RAḪÁ ZÍD.DA DURU5 KU7 [t]arnaš GIŠPÈŠ GIŠGEŠTIN ḪÁD.DU.A kallaktar parḫuenaš ŠA DINGIR-LIM memal kuitta parā tepu UDUiyandaš SÍGḫuttulli [1 D]UGKUKUB GEŠTIN apel=(l)a LÚ-aš ŠA BĒL S[Í]SKUR [TÚGBAR.TEḪ]Á-aš našma TÚGGÚ.È.A

10 -- n=at=šan [AN]A NINDA.ERÍN.MEŠ [ki]tta

§ 3

11 -- [n=a]t DUMU.MUNUS šuppeššaraš karapzi

12 -- EN SÍSK[UR=m]a [wa]rpanza

13 -- n=aš EGIR-an iyattari

14 -- [ … ]-az warpanza

15 -- n=at gimri dammeli [ped]i pētummēni nu tiyaueni

16 -- NINDA.ERÍN.MEŠ=[m]a [DUMU.MUNUS=pa]t karpan ḫarzi

17 -- nu KÁ.GALḪÁ-TIM ŠA GIḪÁ iyami

§ 4

18 -- [namm]a=at IŠTU SÍG SA5 SÍG BABBAR anda išḫiš[k]īmi

19 -- [nu AN]A EN SÍSKUR GIŠḫūišan GIŠḫūlaliy[a ŠU-i] anda teḫḫi

20 -- n=aš=kan KÁ.GALḪÁ-TIM kattan [arḫa] uizzi

21 -- n=aš=kan GIM-an KÁ.GALḪÁ-TIM [par]ā tiyazi

22 -- nu=(š)ši=(š)šan GIŠḫūeša[n] [GIŠ]ḫūlaliya arḫa daḫḫi

23 -- nu=(š)ši GIŠPAN [GIḪÁ p]iḫḫi

24 -- n=ašta anda kiššan memaḫḫi

25 -- kāša=wa=ta=(k)kan MUNUS-tar arḫa daḫḫun

26 -- nu=wa=(t)ta EGIR-pa LÚ-tar piḫḫun

27 -- nu=wa=[za MUNUS-aš] šaklin arḫa [n]amma pešši[yat]

28 -- nu=wa=za šarā LÚ-aš š[ak]lin [datta]

§ 5

29 -- nu parā ḫan- … [ … ]-ni?

30 -- nu [ … ]

31 -- n=ašta anda k[iššan mem]aḫḫi

32 -- … [ … ] kāša=wa=(t)t[a …]

§ 6

33 -- nu=wa?=(š)ši ḫattaršaza [ … ] … [k]itta

34 -- našma=wa=za DUMU.MUNUS šuppešaraš … [ … -t]at

35 -- nu=wa=(š)ši=kan andakitti=(š)ši kattanta pait

36 -- nu=wa kāš tantukešnaš DUMU-aš šaknaš šieḫunaš

37 -- nu=(d)du=(š)šan UL wemiyat

§ 7

38 -- kinun=a=šta kāša kattan EGIR-pa kinuwaš=šaš uit

39 -- nu=(t)ta DINGIR-LUM DINGIR-LIM-anni EGIR-an šanḫiškezzi

40 -- nu=za mān ḪUR.SAG-i

41 -- nu=za mān wēllūi

42 -- nu=za mān ḫāriya

43 -- kuwapit=za imma kuwapi

44 -- nu kēdani antuḫši kattan aššuli eḫu

45 -- nu=(t)ta=(k)kan ḫūwanteš ḫēūš IGIḪÁ-wa lē walḫanniyanzi

§ 8

46 -- nu=(d)du=za paizzi DINGIR-LAM DÙ-zi

47 -- nu=(t)ta pēdan ḫinikzi

48 -- nu=(t)ta É-er pāi

49 -- nu=(t)ta ÌR-an GÉME-an pāi

50 -- nu=(t)ta GU4ḪÁ UDUḪÁ pāi

51 -- nu=(d)du=(š)šan maltieššanalan iyazi

§ 9

52 -- nu=(d)du=za kāša mūkiškemi talleškemi

53 -- nu eḫu DEN.ZU-naza MUL taknaš DUTU-un katti=(t)ti uwatet

54 -- GÉMEḪÁ=ya=(t)ta ÌRMEŠ peran ḫuiyanteš ašandu

55 -- DINGIR.LÚMEŠ=ta [DINGIR.MUNUSMEŠ] peran ḫuyanteš ašandu

56 -- nu kēdani antuḫši kattan eḫu

57 -- DUMU-annaš=ši DAM=ZU zik

58 -- n=an=za EGIR-an kappūi

59 -- nu=(š)ši=kan anda naiešgaḫut

60 -- nu=(š)ši menaḫḫanda memi

61 -- nu=(š)ši GÉME=KA maniyaḫ

62 -- n=aš=za GIŠiugan kišari

63 -- nu=za DAM=ZU dāu

64 -- nu=za DUMU.NITAMEŠ DUMU.MUNUSMEŠ iyaddu

65 -- n=at tuel ÌRMEŠ=KA GÉMEMEŠ=KA

66 -- nu=(t)ta SÍSKURḪÁ-TIM NINDAḫaršaūš memal DUGišpanduzziyaššar apē peškanzi

§ 10

67 -- nu=(d)du=za kāša kāš antuwaḫḫaš UL šekta

68 -- kinun=a=(t)ta kāša EGIR-an šaḫta

69 -- nu kāš maḫḫan tuk EGIR-an šaḫta

70 -- nu=(š)ši=kan zik DINGIR-LUM anda aššuli tīya

71 -- nu=(t)ta KI-i šer kuedani uddānī mukeškiuen[i]

72 -- nu=za DINGIR-LUM DINGIR-LI[M-tar] tekkušnut

73 -- n=at SIG5-i[n iy]a

74 -- nu=(d)du=[za tuel ŠA DINGIR-LIM DINGIR-LIM]-tar šarā aušdu

75 -- [nu=(d)d]u=za uizzi Š[A SAG.DU=ŠU DINGIR-LAM] iya[zi]

76 -- [n]u=(š)šan [paršiyanduš? NINDA.GUR4.RAḪÁ?] EGIR-pa ANA ⌈NINDA.ERÍN.MEŠ⌉ šer ⌈teḫḫi⌉

77 -- nu EGIR-pa parna pāiwani

78 -- nu SÍSKUR kuedani parni iššaḫḫi

79 -- nu GIŠBANŠUR GIBIL kittari

80 -- nu=(š)šan NINDA.ERÍN.MEŠ šer INA GIŠBANŠUR teḫḫi

81 -- peran katta=ma DUGKUKUB teḫḫi

§ 11

82 -- nu=(š)šan paršiyanduš NINDA.GUR4.RAḪÁ kuiēš ANA NINDA.ERÍN.MEŠ kianta

83 -- n=ašta tepu daḫḫi

84 -- nu LÚ-i BĒL SÍSKUR piḫḫi

85 -- n=at=za=kan išši=(š)ši dāi

86 -- ekuzi=ya 3=ŠU DUliliyaššin

87 -- m[a]ḫḫan nekuzzi

88 -- nu=za BĒL SÍSKUR GIŠ[BA]NŠUR=pat peran šešzi

89 -- G[IŠN]Á-aš=ši GIŠBANŠUR=pat peran katta tiyanzi

§ 12

90 -- AN[A NINDA.ERÍ]N.MEŠ=ya=(š)šan šer kue TÚGBAR.TEMEŠ n[ašm]a TÚGGÚ.È.A kitta

91 -- n=a[t=z]a išpandaz katta išpareškezzi